БИШКЕК, 2-ноя. — Sputnik. Ош шаарындагы №27 мектептин 7-классынын окуучусу унаа айдап бара жатып үч адамды коюп кеткенин калаанын Жол кайгуул кызматы билдирди.
Маалыматка ылайык, окуя Салиева көчөсүндөгү №21 үйдүн маңдайынан болгон. Окуучу Сыймык Кылычбек уулу үйдөн O 72 29 AL номерлүү "Хонда Фит" унаасын айдап чыгып кырсыкка кабылган машина Мирсейит Жуманазаров аттуу жаранга тиешелүү экени аныкталды.
"Сокку анча катуу болгон эмес. 20 жаштагы кыз менен бир жашар наристе катуу коркуп калышкан. Ал эми алардын апасы 84 жаштагы Зыйнат Кабыеванын буту ооруксунуп калган. Ал эми айдоочу жабыркаган эмес", — деп айтылат билдирүүдө.
Учурда мектеп окуучусунун унаага кантип ээ болгондугу текшерилип жатат. Жол кайгуул кызматы баланын ата-энеси айып пул төлөшү мүмкүн экенин белгиледи.
