Чалдоварда жол тосуп, милицияга таш ыргыткандар боюнча териштирүү иштери башталды

Жазылуу
Милициядан билдиришкендей, жол тоскондор түндө барып, айылдык милиция бөлүмүн таш бараңга алып, андан эки милиция кызматкери жаракат алган. Алар мас абалында болгонун укук коргоо органдары баса белгилейт.

БИШКЕК, 2-ноя. — Sputnik. Чүй облусунун Панфилов районундагы Чалдовар айылында жол тоскондор боюнча териштирүү башталды. Бул тууралуу Чүй ОИИББдин маалымат кызматы билдирди.

31-октябрда болжол менен кечки саат 5.30дарда 70-80дай жергиликтүү тургун Бишкек – Чалдовар жолуна үч машина коюп, жолду бир нече жолу тосууга аракет кылышкан. Чогулгандардын айтымында, алар мындай кадамга жергиликтүү тургундун асынып өлгөнүнөн улам барышкан. Анын өлүмүнө милиция кызматкерлери себепкер болушканын алар билдиришүүдө.

ИИМ кызматкерлери. Архив - Sputnik Кыргызстан
Чүй ИИББдин жетекчилиги Чалдовардагы пикетчилер менен жолугууда
Милициянын маалыматына ылайык, К.Р. аттуу жаран өлөр күнү аялы менен урушуп үйүнөн чыгып кеткен. Эртең менен аны кайненеси короодо асынып турган жеринен тапкан. Буга чейин 2015-жылдын 3-августунда аталган жаран райондук ИИБ кызматкерлери тарабынан баңгизат колдонгон деген шек менен милиция бөлүмүнө алынып келген. Ага түшүндүрүү иштери жүргүзүлүп, үйүнө коё берилген.

Жол тоскон жарандар түнкү саат 1.00дөр чамасында айылдык милиция бөлүмүнө барып, Панфилов РИИБдин кызматкерлерине таш ыргытышкан. Анын кесепетинен эки кызматкер жаракат алып, аймактык ооруканага медициналык жардам үчүн кайрылышкан. Таш ыргыткандар мас абалында экенин Чүй ОИИББи билдирди. Аталган факты боюнча Кылмыш жаза кодексинин 287-беренеси ("Авто жолдорун пайдалануу жана аны коргоо эрежелерин бузуу") жана 341-беренеси ("Бийлик өкүлүнө кордук көрсөтүү") боюнча кылмыш белгилери аныкталып, каттоого алынган.

Жергиликтүү тургундар чогулган жерге ИИМдин, Чүй ОИИББдин жетекчилери жана Панфилов райондук ички иштер бөлүмүнүн жеке курамы келип элге түшүндүрүү иштерин жүргүзгөн. Каттоого алынган фактылар боюнча керектүү аракеттер көрүлүүдө.

Учурда Чалдоварда абал тынч.

Жаңылыктар түрмөгү
0