БИШКЕК, 30-окт. — Sputnik. Баткен облусунда күз-кыш мезгилине даярдык көрүлүп, социалдык объекттерге көмүр жеткирүү улантылууда. Бул тууралуу облустук администрациядан билдиришти.
Октябрь айынын башына алынган маалымат боюнча 179,7 миң тонна көмүр казылган. Бул былтыркы жылга салыштырмалуу 52,7 миң тоннага көп.
Облус аймагындагы билим берүү мекемелерине октябрь айынын аягына карата 6 659,4 тонна (57,7 пайыз) көмүр ташылып анын каржылануусу 18,3 миллион сомду түзгөн. Анын ичинен республикалык бюджет эсебинен 10,6 миллион сом, жергиликтүү бюджет эсебинен 7,6 миллион сом каралган.
Ал эми саламаттыкты сактоо мекемелерине 5 миллион 889 миң сомго 1 075 тонна көмүр ташылып келген.
Андан сырткары, облус эли 63 миң тонна көмүр керектеп, анын 46,9 миң тоннасы бүгүнкү күнгө ташылып келген.
