БИШКЕК, 30-окт. — Sputnik. Талас облусундагы "Манас Ордо" улуттук комплексинде "Каныкей булак" архитектуралык ансамбли ачылганын аталган комплекстин директору Ормон Чоюнбаев билдирди.
Ал ансамбль курулган жер байыртадан эле эл оозунда Каныкей энени коштоп-жандап жүргөн 40 кыздын булагы катары айтылып келгенин белгилеп өттү.
"2001-жылы "Манас Ордо" комплекси курулгандан кийин каралбай калган булактардын көзүн ачып, айлана-тегереги тазаланган. Андан кийин 2011-жылы ушул жерге архитектуралык комплекс курууну чечтик. Мында Каныкей эне кайненеси Чыйырды менен Семетейди казатка аттантып жаткан элеси түшүрүлгөн", — деди Чоюнбаев.
Жаңы комплекстин ачылуу аземинде мектеп окуучулары арасында Манас айтуу боюнча сынак уюштурулуп, жеңүүчүлөргө акчалай сыйлык жана атайын байгелер тартууланды.
