БИШКЕК, 29-окт. — Sputnik. Кыргызстандын премьер-министринин милдетин аткаруучу Темир Сариев Душанбе шаарында тажик кесиптеши менен жолукканын Sputnik агенттигинин кабарчысы жеринен билдирди.
Сариев Тажикстандын премьер-министри Расулзода менен жолугуп, эки мамлекеттин мындан аркы кызматташуусун талкуулашты. Расулзода кыргызстандык кесиптешин парламенттик шайлоонун ийгиликтүү өткөнү менен куттуктады.
"Биз дагы дүйнө коомчулугу сыяктуу биринчи жолу биометрикалык маалыматтарды колдонуу менен Кыргызстанда өткөн шайлоого көз салдык. Адилет шайлоо өткөргөнүңүздөр үчүн куттуктоого уруксат этиңиз. Учурда дүйнө коомчулугу экономикалык каатчылыкты сезип жатат. Бирок, мындай көрүнүштөргө карабастан, эки мамлекеттин экономикалык тармакта кызматташуусу өнүгүп жатат",— деди Расулзода.
Кыргызстандын өкмөт башчысы кесиптешине жылуу кабыл алганы үчүн ыраазычылык билдирип, эки мамлекеттин мындан ары да тыгыз кызматташуусу керектигин белгиледи.
"Эң негизги максат – ушул темпти жоготпой эки мамлекеттин ортосундагы товардын айлануусун жаңы деңгээлге чыгаруу. Учурда мамлекеттер аралык келишимдер жакшы иштеп жатат. Алар мамлекеттер ортосундагы товар айлануунун солгундашына мүмкүндүк бербейт", — деди Сариев.
Ал ошондой эле, КМШ мамлекеттеринин өкмөт башчыларынын кеңешинин жыйынында маанилүү маселелер боюнча тийиштүү чечимдер кабыл алынат деп ишенерин баса белгиледи.
