БИШКЕК, 29-окт. — Sputnik. 1-2-ноябрда ченемден тышкары суук болуп, жаан карга айланат. Зымдарга жана бактарга суу кар жармашат. Бул тууралуу "Кыргызгидромет" билдирди.
Маалыматка ылайык, тоолуу аймактардын автожолдорунда кар күрткү, жолдор тоңголок, тайгак болот. Кээ бир райондордо батыштан соккон шамалдын ылдамдыгы секундасына 18-23 метрге чейин жетиши күтүлөт.
Абанын күндүзгү температурасы Чүй, Талас облустарынын дыйканчылык аймактарында жана тоо этектеринде —2 градус суук болот. Ош, Жалал-Абад, Баткен облустарынын дыйканчылык аймактарында 6 градус жылуу болсо, Ысык-Көл, Нарын облустарынын дыйканчылык аймактарында 6 градус, тоолуу аймактарда 10 градус суук болот.
Мындай туруксуз аба ырайы айыл чарба иштерин, автоунаа, энергетика жана коммуналдык кызматтардын ишин жана жайыттарда малды кармоону кыйындатат.
