БИШКЕК, 28-окт. — Sputnik. Республикалык олимпиадалык резерв окуу жайынын ишинде бир катар кемчиликтер аныкталгандыгы вице-премьер Дамира Ниязалиеванын жетекчилиги менен өткөн окуучулар арасындагы зордук-зомбулук менен күрөшүү комиссиясынын жыйынында билдирди.
Буга чейин спорт мектебиндеги жаңжалдардан улам аталган окуу жайдын ишмердүүлүгүн 9-ноябрга чейин токтотуп, толугу менен текшерүү үчүн комиссия түзүлгөн.
"Иликтөө иштеринин натыйжасында спорт мектебинин өткөн оку жылына анализ жасалбаганы аныкталган. Планда көрсөтүлгөн иштер жалпы мааниде экени аныкталып, тарбиялануучулар менен жеке иштер өткөн эмес. Социалдык мугалимдин иши жок. Окуучулардын жетишкендиги боюнча салыштырмалуу анализ жасалган эмес", — деп билдирген комиссия.
Комиссиянын берген жыйынтыгы менен Ниязалиева Билим берүү жана илим министрлигинин, Мамлекеттик дене тарбия жана спорт агенттигинин ишмердүүлүгүндө кемчиликтер бар экенин белгилеп өттү. Анын айтымында, билим берүү мекемелериндеги кемчиликтерге окутуучулардын жетишсиздиги жана аларга ашкере жүктөлгөн милдет да себеп болууда.
"Мектепте кадр жетишсиздигинен улам мугалимдер эки сменада иштөөгө муктаж. Мында экиден төрт класска чейин жетекчилик кылгандар да бар экен. Бул, албетте, окутуунун сапатына терс таасирин тийгизүүдө", — деди Ниязалиева.
Жыйын соңу менен ар бир райондук жана шаардык билим берүү бөлүмдөрүндө методикалык борборлорду ачуу жана Республикалык олимпиадалык резерв окуу жайын толугу менен реформалоо зарылдыгы белгиленди. Мындан тышкары, ИИМдин балдар арасында жан кыюу, кылмыштардын алдын алуу боюнча иштеп чыккан иш-чаралардын планы өкмөттүн кароосуна алып чыгылары белгилүү болду.
