БИШКЕК, 28-окт. — Sputnik. Премьер-министр Темир Сариев Афганистандагы жер титирөөдөн этникалык кыргыздардын канчалык деңгээлде жабыр тартуусун тактоо жана зарыл жардам көрсөтүү боюнча сунуш даярдоону тапшырды. Бул тууралуу КР өкмөтүнүн маалымат кызматы билдирди.
Ага ылайык, Сариев Өзгөчө кырдаалдар министрлигине Афганистандагы жер титирөөдөн этникалык кыргыздардын канчалык деңгээлде жабыр тартканын тактоо тапшырмасын берди.
Тапшырма боюнча Өзгөчө кырдаалдар министрлиги, Тышкы иштер министрлиги жана Кыргызстандын Афганистандагы элчилиги менен биргеликте этникалык кыргыздардын табигый кырсыктан канчалык жабыр тартканын тактап, зарыл болгон жардам көрсөтүү боюнча сунуш даярдоосу тийиш.
Учурда КР Өзгөчө кырдаалдар министрлиги аталган тапшырма боюнча ишти баштады.
Президент Алмазбек Атамбаев адам өмүрүнө забын болгон жер титирөөгө байланыштуу Афганистан жана Пакистан мамлекеттеринин башчыларына көңүл айтты.
