БИШКЕК, 27-окт. — Sputnik. Тез жардам кызматкеринин ур-токмокко алынышы боюнча иштин иликтенишин вице-премьер Дамира Ниязалиева жеке көзөмөлүнө алганын өкмөттүн маалымат кызматы билдирди.
Врачка кол көтөргөн 29 жаштагы жаран дароо милиция кызматкерлери тарабынан кармалып, "бейбаштык" беренеси боюнча кылмыш иши козголгон.
Ниязалиеванын айтымында, бул тез жардам кызматкерлеринин ар кандай зордук-зомбулукка туш болгон биринчи учур эмес. Вице-премьер ансыз да алардын саны жетишпей турганын, айлык акысынын төмөндүгүн белгиледи.
"Дарыгердин сабалышы боюнча иш тыкыр изилденип, күнөөлүү тарап мыйзам чегинде жоопкерчиликке тартылышы кажет. Биз мындай терс аракеттерге кескин чараларды көрүүгө милдеттүүбүз", — деди атка минер.
Ниязалиева аталган фактыны иликтөө иштери жеке көзөмөлгө алынарын кошумчалады.
