БИШКЕК, 27-окт. – Sputnik. Ош шаарында расмий ачылышы эртең боло турган эстакадалык көпүрө бүгүн сыноодон өтөт. Анын сапаттуу курулгандыгына шаар мэри Айтмамат Кадырбаев өзү кепилдик берерин Sputnik маалымат сайтына билдирди.
"Бүгүн Навои көчөсүндө курулуп жаткан көпүрөнү алгачкы ирет сыноодон өткөрөбүз. Ал үчүн көпүрөнүн узундугу менен оор техникалар токтотулат. Мен бул объектинин сапаттуу курулгандыгына кепилдик берип, сыноо учурунда көпүрөнүн алдында турам", — деди Ош мэри Кадырбаев.
Ош шаарындагы Навои көчөсүндө курулуп жаткан эстакадалык көпүрө эртең өлкөнүн биринчи адамдарынын катышуусу менен ачылат.
Көпүрөнү сыноо бүгүн 27-октябрда кечки саат 17:00дө болот.
Көпүрө россиялык гранттын эсебинен курулууда, ага 100 миллион сом бөлүнгөн. Түштүк борборго алгач ирет түшүп жаткан эстакадалык көпүрөнүн узундугу 264, туурасы 24 метр.
