БИШКЕК, 23-окт. — Sputnik. Ош шаарынын мэри Айтмамат Кадырбаев түштүк борбордун жетекчилерин "Алай" футболдук командасын колдоого чакырды.
Шаар башчысы бул туурасында вице-мэрлер, шаардагы мекеме-ишканалардын жетекчилери катышкан коллегияда айтты.
Ал "Алай" футболдук командасы Кыргызстандын чемпиондугунда 44 упай менен биринчи орунда келе жаткандыгын билдирди.
"Футболчулар акыркы эки оюнун Ош шаарынын борбордук стадионунда ойнойт. 25-октябрда "Алай" командасы Нарын шаарынын "Ала-Тоо" командасын, ал эми 31-октябрда Бишкектин "Алга" командасын кабыл алат. Ошондуктан, баарыңыздарды — жалпы шаардыктарды алдыда боло турган эки оюнда сүйүктүү командабызды колдоого чакырам", — деди Кадырбаев.
Бул оюндар өлкөнүн футбол боюнча чемпионатынын алкагында өтүүдө.
