Кичинекей кызды сүзүп кеткен бала окуя болгон жерден эмнеге качып кеткенин айтып берди

Бешинчи класста окуган кызды сүзүп кеткен 18 жаштагы студент бала катуу корккондуктан рулду коё берип, педалды да бошотуп жиберген.

Адам өмүрүн алган жол кырсыгы шейшемби күнү кечки саат 5:10дор чамасында болду. 

Такталган маалыматтар боюнча, айдоочу Жукеев-Пудовкин көчөсү менен түндүк тарапты көздөй бараткан. Анын айтымында, Орто-Сай базары жактагы киши өтүүчү жерден ылдамдыкты азайтпастан, кишилерди буйтап өтөм деп жатып ал "капысынан чыга калган кызды көрбөй калган".

Бишкек ШИИБ Жол кайгуул кызматынын бөлүм башчысы Ажыбек Майназаровдун айтымында, катуу ылдамдыкта келе жаткан айдоочу кызды машинанын капотунда 50 метрдей сүйрөп барган. Кыз жерге катуу урунуп, тез жардам кызматы келгенге чейин кырсык болгон жерде каза болгон.

Айдоочу машинаны башка жакка буруп, рулду башкара албай калгандыктан, жол четиндеги белгини сүзүп барып токтогон. Машинада эки жүргүнчү – айдоочунун достору бар болчу. Алар да катуу коркконунан качып кетишкен.

Айдоочу кырсык болгон жерге келген атасынын жардамы аркылуу кармалган. Баласы атасына чалып, жол кырсыгына кабылганын кабарлап, машинаны Орто-Сай базары жакта калтырганын айткан. Кырсык болгондон бир сааттан кийин ал кармалган. Наркологиялык тестин жыйынтыгы боюнча ал соо экени аныкталды.

Бул факты боюнча Кылмыш жаза кодексинин 281-беренесинин (адам өлүмүнө алып келген жол кырсыгы) негизинде кылмыш иши козголду.