БИШКЕК, 21-окт. — Sputnik. Бишкек – Нарын – Торугарт кан жолунда жарылуучу зат табылып, ал зыянсыздандырылганын Өзгөчө кырдаалдар министрлигинин маалымат кызматы билдирди.
Маалыматка ылайык, аталган унаа жолдун 307-чакырымында жол куруп жаткан Кытайдын "Копри-Синогидро" компаниясынын кызматкерлери белгисиз көлөмдөгү жарылуучу затты (аммонит) таап алгандары тууралуу маалымат келип түшкөн.
13-октябрдан тартып коопсуздук эрежелерин сактоо максатында жарылуучу зат табылган аймакка атайын белгилер коюлуп, жол куруу кызматкерлерине тиешелүү түшүндүрүү иштери жүргүзүлдү. Райондук ички иштер бөлүмүнүн кызматкерлери тарабынан күзөт уюштурулган.
20-октябрда аталган жарылуучу затты зыянсыздандыруу үчүн КРдин Коргоо министрлигинин Кой-Таш айылында жайгашкан аскер бөлүгүнөн саперлор барып, саат 16:35те жарылуучу затты зыянсыздандырышкан.
