БИШКЕК, 21-окт. — Sputnik. Sputnik редакциясынын окурманы WhatsApp-каналга пакеттерге оролуп салынган килемчелердин сүрөтүн жөнөткөн.
Мындай сүрөттөр Facebook социалдык тармагында да жайылып кеткен. Пайдалануучулар ортосунда аталган килемчелердин эски-жаңысы тууралуу талаштар өкүм сүрүүдө.
Друг прислал фото, Жогорку Кенеш закупил новые ковры и ковровые дорожки!!!
Posted by Salamat Timurov on 20 октября 2015 г.
Ал арада Кыргызстандын Мамлекеттик сатып алууларынын сайтында Жогорку Кеңештин иш башкармалыгы тарабынан жаңы килемчелерди сатып алуу боюнча тендер жарыясы жайгаштырылган. Жалпы суммасы 4 миллион 998 миң 149 сомду түзөт.
Sputnik агенттигинин кабарчысы Жогорку Кеңештин иш башкармалыгынын жетекчиси Алмазбек Кожомкулов менен байланышкан. Ал ошол маалда эмгек өргүүдө жүргөндүктөн, тендер тууралуу кабары жок экенин билдирди.
Редакция Кожомкуловдун орун басары Нурбек Кадыров менен бир ирет байланышууга аракет кылды, бирок мындан эч майнап чыккан жок.
Буга чейин Жогорку Кеңеш 2,6 миллион сомго 120 депутаттык кресло сатып алууга тендер жарыялаган. Бирок маалымат каражаттарында жана Facebook тармагындагы нааразычылыктардан улам эл өкүлдөрү эски креслодо эле отурмай болушкан. Бул боюнча социалдык тармактарда флешмобдор өтүп келген.
