БИШКЕК, 20-окт. — Sputnik. Кыргызстандын аймагында 22-24-октябрь күндөрү ченемден тышкары суук жана жаан-чачындуу аба ырайы күтүлүп жатканын ӨКМ билдирди.
Маалыматка ылайык, тоо этектерине жана Чүй, Талас өрөөндөрүндө жааган жаан карга айланат, тоолордо кар жааса, айрым жерлерде жаан-чачын нөшөргө айланат.
Бул күндөрү абанын күндүзгү температурасы кескин төмөндөп, Чүй, Талас облустарынын дыйканчылык аймактарында 1 градус сууктан 4 градуска чейин жылуу болот. Ош, Жалал-Абад, Баткен облустарынын дыйканчылык аймактарында 3…8 градус жылуу, тоо этектеринде 2 градус сууктан 3 градуска чейин жылуу болушу күтүлөт. Ал эми Ысык-Көл, Нарын облустарынын дыйканчылык аймактарында 3 градус сууктан 2 градуска чейин жылуу болуп, бийик тоолуу райондордо абанын температурасы 8 градус суук болот.
Министрлик мындай туруксуз аба ырайы айыл чарба иштерин, автоунаа, энергетика жана коммуналдык кызматтардын ишин жана жайыттарда малды кармоону кыйындатарын эскертет.
