БИШКЕК, 20-окт. — Sputnik. Мамлекеттик тилди өнүктүрүү максатында Википедияга жайгаштыруу үчүн Билим берүү жана илим министрлиги 50 миң сөз даярдап бергенин аталган мекеме билдирди.
Маалыматка ылайык, материал "Кыргыз тилинин жыштык сөздөрү" сөздүгүн түзүү алкагында грамматикалык категорияларга бөлүнүп иштелип чыккан. Мындан тышкары, аталган сөздүктү пайдалануу менен кыргыз тилинде Google Translate түзүлүп жатканы белгилүү болду.
"Пайдалануучуга кыргыз тилиндеги Википедияны тартуулоо менен министрлик кыргыз тилин тереңден үйрөнүүгө, аны жайылтууга шарт түзүүдө", — деп айтылат билдирүүдө.
Аталган мекеме бүгүнкү күндө министрлик менен Википедияны иштеп чыккандар тыгыз кызматташып келерин белгилейт.
