БИШКЕК, 19-окт. — Sputnik. Бүгүн Бишкекте V Эл аралык "Арт-Ордо" театралдык фестиваль баштала турганын Маданият, маалымат жана туризм министрлиги билдирди.
19-23-октябрь күндөрү өтө турган иш-чарага алты чет элдик жана сегиз кыргызстандык театр катышат. Кароо сынакка Казакстан, Өзбекстан, Тажикстан, Татарстандын театрларынын келиши күтүлүүдө.
Фестивалдын расмий ачылышы бүгүн, 19-октябрда саат 16.30да Токтоболот Абдымомунов атындагы Улуттук академиялык драма театрында өтөт.
Эл аралык эксперттерден турган калыстар тобу эмгектерди "Мыкты спектакль", "Мыкты режиссура", "Мыкты сценография", "Мыкты эркектин ролу", "Мыкты аялдын ролу", "Экинчи пландагы мыкты эркектин ролу", "Экинчи пландагы мыкты аялдын ролу", "Сынчылардын тандоосу" номинациялары боюнча баалайт.
Күндүзгү сеанстарга окуучу жана студенттер үчүн кирүү акысыз.
