БИШКЕК, 16-окт. — Sputnik. "Кыргызкөмүр" ишканасы 2010-жылдан тарта бонустарды төлөбөй келгендиктен, алардын өкүлүн чакырып, лицензиясын жокко чыгаруу боюнча чечимди Геология жана минералдык ресурстар боюнча мамлекеттик агенттиктин кен байлыктарды пайдалануу маселелери боюнча комиссиясы 16-октябрдагы жыйынында кабыл алды. Бул тууралуу агенттиктин маалымат кызматы билдирди.
Маалыматка ылайык, Геология агенттигине салык кызматынан "Кыргызкөмүр" ишканасы салыктарды төлөбөй жаткандыгы боюнча маалымат келип түшкөн.
"Салык инспекциясынан келген билдирменин негизинде коммиссия "Кыргызкөмүр" мамлекеттик ишканасынын өкүлүн чакырып, лицензиясын жокко чыгаруу боюнча чечим кабыл алды", — деди ал.
"Кыргызкөмүр" мамлекеттик ишканасы кен байлыктарды иштетүү боюнча лицензияны 2009-жылы алган.
