БИШКЕК, 15-окт. — Sputnik. Нарындын Жумгал районунда кишини сүзүп качып кеткен айдоочу эки жумадан кийин табылганын ИИМ билдирди.
Маалыматка ылайык, үстүбүздөгү жылдын 1-октябрында Кызыл-Жылдыз айылынын жолунан өтүп бара жаткан кишини коюп, окуя болгон жерден из жашырып кеткен.
Аталган факт боюнча кылмыш иши козголуп, иликтөө иштери башталган. Анын натыйжасында кырсыкка себепкер "Мерседес-Бенц 180" үлгүсүндөгү унаанын 25 жаштагы айдоочусу кармалган.
Учурда ал убактылуу кармоочу жайга киргизилип, машина унаа токтотуучу жерге коюлду. Тергөө иштери улантылууда.
