БИШКЕК, 15-окт. — Sputnik. Өлкөнүн биринчи айымы Раиса Атамбаева тамактануу боюнча Кыргызстандагы глобалдуу кыймылынын илимий коомчулугунун координатору болот. Бул туурасында БУУнун Балдар фондунун Кыргызстандагы өкүлчүлүгүнөн билдиришти.
БУУнун Балдар фондунун колдоосу менен өткөн бул жолугушууда азык-түлүк коопсуздугу жана тамактануу маселесин чечүүдө илимий коомчулуктун ролу талкууланды.
Координатордун иши — азык-түлүк коопсуздугуна, тамактанууну жакшыртууга салым кошо турган илимий иликтөөлөрдү иштеп чыгуу, аны колдонуу, эл аралык тажрыйбаларды өлкөгө алып келүү жана ылайыкташтыруу.
Жолугушууга өлкөдөгү айыл чарба, саламаттыкты сактоо, биология, тоо кендери жана башка илимий тармактар боюнча жогорку окуу жайларында сабак берген кыркка чукул окутуучулар катышты. Алар өлкөнүн биринчи айымы Атамбаеваны тамактануу боюнча Кыргызстандагы глобалдуу кыймылдын илимий коомчулугунун координаторлугуна талапкерлигин көрсөттү.
Алар азык-түлүк коопсуздугун жана тамактануу маселеси ар тараптан жасалган мамилелерди талап кылат дешти. Буга кошумча, муну чечиш үчүн ар бир тармактын өкүлдөрүнүн — өкмөттүн, жеке сектордун, эл аралык уюмдардын биргелешип иштеп чыккан сунуштары зарылдыгын айтышты.
