БИШКЕК, 15-окт. — Sputnik. Президент Алмазбек Атамбаев өзүнүн фондунан курман болгон ЖАМК кызматкерлеринин үй-бүлөсүнө жана кылмышкерлерден жабыркап оор абалда ооруканада жаткан Тилек Абылгазиевге 50 миң сомдон бөлүп бергенин өлкө башчынын маалымат кызматы билдирди.
Кызмат учурунда курман болгон кызматкерлер кечээ жерге берилди. Ал эми баш сөөктөрү сынып, мээсине доо кеткен Абылгазиев учурда Улуттук госпиталдын нейрохирургия бөлүмүндө дарыланууда. Ага кечээ экинчи ирет операция жасалды. Дарыгерлер бейтаптын абалы оор болгону менен дем алуусу бир калыпта экенин айтышууда.
Президенттин бөлүп берген каражаты бүгүн ЖАМК жетекчилиги тарабынан өз даректерине берилди.
Буга чейин өкмөттүн атынан вице-премьер Абдырахман Маматалиев материалдык жардам иретинде аталган жарандарга 50 миң сомдон акча берген.
