БИШКЕК, 15-окт. — Sputnik. Үч эм төрөгөн 28 жаштагы экинчи топтогу майып Жылдыз Казиеванын абалын вице-премьер Дамира Ниязалиева ооруканага барып көргөнүн өкмөттүн маалымат кызматы билдирди.
Маалыматка ылайык, үч эм кыздар Чүй облустук ооруканасынын төрөт бөлүмүндө жарыкка келген. Ар бири эки килограммга жетпеген салмакта ай-күнүнө жетпей төрөлгөн ымыркайлардын энеси операция жолу менен көз жарды. Бүгүн аларды Эне-баланы коргоо улуттук борборуна которуу каралууда.
Сүйлөшүү учурунда мектеп мугалими Казиева Токмок шаарында батирде акча төлөп турарын, күйөөсүнүн туруктуу жумушу жок экенин белгиледи. Анын айтымында, жаңы төрөлгөн ымыркайлардын 2,5 жаштагы агасы да тубаса шал оорусу менен жабыркайт. Турак жай сатып алууга каражат болбогондуктан, Казиева вице-премьерден жардам сурады.
Жолугушуудан соң Ниязалиева оорукананын абалы менен таанышып, эмгек жамаат менен пикир алмашты. Негизинен анда акыркы убакта төрөттүн көптүгүнөн көз жаргандар ымыркайлары менен чоң залдарда жатууга аргасыз болуп жатканы белгиленди.
Өз кезегинде вице-премьер аталган көйгөйлүү маселелердин баарын өкмөт башчыга маалымдай турганын билдирди.
