Шайлоонун расмий жыйынтыгы боюнча КСДП, "Республика Ата-Журт", "Кыргызстан", "Өнүгүү – Прогресс", "Бир Бол" жана "Ата Мекен" жети пайыздык босогодон өтүп, жеңишке жеткен.
Баарынан көп — 38 мандатка КСДП ээ болду. "Республика — Ата-Журт" партиясы 28 орун ээлей турган болсо, "Кыргызстан" партиясына 18, ал эми "Өнүгүү — Прогресс" партиясына 13 мандат тийди. "Бир Бол" партиясынын өкүлү 12 депутат болсо, "Ата Мекен" партиясы 11 мандат алмай болду.
Sputnik агенттиги бул орундарды Жогорку Кеңештин жыйындар залы боюнча бөлүштүрүп көрдү. Бул болжолдуу бөлүштүрүү экенин эскертебиз.
Кыргызстандын тарыхында биринчи жолу шайлоо биометрияны колдонуу менен өттү. Шайлоочулардын тизмеси биометрикалык каттоодон өтүп, добуш берүү укугуна ээ болгон 2 миллион 671 миң 297 жарандын маалыматынан түзүлдү. Шайлоодо бардыгы болуп 1 миллион 630 миң жаран же шайлоочулардын 59 пайызы добуш берди.
