БИШКЕК, 15-окт. — Sputnik. Француз соту эки жыныстык белгиси менен төрөлгөн жарандын өзүн "орток жыныстагы" адамдардын өкүлү деп атоо укугун биринчи жолу тааныды деп билдирет Франс Пресс агенттиги.
Агенттиктин маалыматына ылайык, төрөлгөндө эле эркек деп жазылган 64 жашар доочу үстүдөгү жылдын июнунда өзүнө "орток жынысты" тандоо укугун ыйгаруу талабы менен сотко кайрылган. Эми ал бул статусту 20-августта күчүнө кирген сот чечимине ылайык, жеке расмий документтеринде көрсөтө алат.
Бирок, прокурордун орун басары Жо Патард белгилегендей, иштин үстүнөн кайра доо арызы берилиши керек. Ал бул маселе боюнча жогору турган бийликтин токтому талап кылынат, себеби "иш учурда күчкө ээ мыйзамдарга каршы келүүдө" деп эсептейт.
Германия, Австралия, Жаңы Зеландия жана Непал сыяктуу бир катар өлкөлөр жарандарга документтерде өзү үчүн "орток жынысты" тандоо укугун расмий ыйгарганын белгилейт агенттик.
