БИШКЕК, 14-окт. — Sputnik. Мас болгон автоунаа айдоочусунун кол салуусунан улам, жаракат алып реанимацияга түшкөн Жол кайгуул кызматынын инспекторунун абалы жакшы. Милиция кызматкери учурда палатага которулду деп билдиришти шаардык ИИБдин маалымат кызматынан.
30-сентябрга караган түнү кезметте турган милиция бригадасынын токтоткондугуна нааразы болгон мас айдоочу инспекторлор менен чатакташа кетет. Анын айынан милиция кызматкери башынан катуу жаракат алып, буту сынган.
"Учурда милиция кызматкеринин абал дурус, реанимациядан палатага которулуп, дарылануусун улантып жатат", — деп билдирди маалымат кызматынын өкүлү Айгүл Давлетбаева.
Ал эми аталган факт боюнча кылмыш иши козголуп, милиция бригадасына кол салган төрт жаран изи суубай ошол эле түнү кармалып, экөөсү убактылуу кармоочу жайга киргизилген.
