БИШКЕК, 14-окт. — Sputnik. Алдын ала маалымат боюнча үстүбүздөгү жылдын январь-сентябрь айларынын аралыгында негизги капиталга 64,3 миллиард сом инвестиция тартылганын Улуттук статистика комитети билдирди.
Маалыматка ылайык, бул былтыркы жылдын ушул маалына салыштырмалуу 4,5 пайызга көп көрсөткүч. Мында ички булактардын эсебинен каржыланган инвестициянын көлөмү 9,8 пайызга өскөн, ал эми тышкы булактардан, тескерисинче, 9,7 пайызга кыскарган.
Жалпы инвестициянын 73 пайызы кен казуу боюнча объектилерди курууга, электр энергиясы, газ, буу менен камсыздоого жана турак жай курууга жумшалган.
Бул каражаттардын эсебинен 773,3 миң чарчы метр аянтка курулган турак жай пайдаланууга берилди. 1598 орундуу мектептер жана 185 балага ылайыкталып бала бакчалар курулган. Мындан тышкары, бир сменада 337 адамды кабыл алуучу бейтапканалар менен 201 орундуу ооруканалар пайдаланууга берилген.
