БИШКЕК, 13-окт. — Sputnik. Түрмөдөн качып кармалган беш кылмышкердин үчөө абакка кайтарылганын ЖАМК билдирди.
Дүйшөмбүгө караган түнү түрмөдөн тогуз кылмышкер качып чыккан. Аларды токтотууга аракет кылган ЖАМКтын кызматкерлеринин үчөө өлтүрүлүп, бирөө катуу жаракат алган. Жол кайгуул кызматы кылмышкерлердин бешөөнү кармап, калгандары качып кетүүгө үлгүрүшкөн.
Ал арада издөөгө алынган төрт качкын али күнчө табыла элек. Милиция аларды эки суткадан бери Бишкек шаары, Чүй облусу жана Казакстандын Жамбылынан бери издөөдө. ИИМ күчөтүлгөн тартипте кызмат өтөп жатат.
Издөөгө алынган кылмышкерлердин экөө өмүрүнүн аягына чейин эркинен ажыратылып, ал эми дагы экөө тергөө алдында болчу. Бул жарандардын бардыгы диний экстремизм жана терроризмге шектелип кылмыш жообуна тартылган.
