БИШКЕК, 12-окт. — Sputnik. Түрмөдөгү шалаакылык гана камактагылардын качышына себепкер болгонун ЖАМКтын мурунку башчысы Шейшенбек Байзаков билдирди.
ИИМ кылмышка мекеменин коопсуздук кызматынын тиешеси бар деп эсептейт. Ал эми Байзаковдун айтымында, мындай болушу мүмкүн эмес, бирок сакчынын шалаакылыгы кылмышкерлерге жардам берген.
"Балким, качкындар аны камеранын эшигин ачтырууга кандайдыр бир жүйөлүү себеп менен мажбур кылышкандыр. Бир кызматкердин шалаакылыгы менен абакта өкүм сүргөн чаржайыттык үч адамдын өмүрүн алып, дагы бирин жарадар кылды", — деди ал.
Ал мекемеден качып чыгууга мүмкүн эмес экенин белгиледи. Имарат атайы кылмыштуу топтун мүчөлөрүн жана өзгөчө кооптуу кылмышкерлерди кармоого ылайыкташып салынган.
Байзаков түрмөнү уурулукка жана кызмат абалынан пайдаланууга шектелип жумуштан кетирилген Имаш Килтаевдин жетектеп жатканын таң калычтуу факт катары белгилейт.
"Килтаевге карата кылмыш иши негизги күбөнүн издөөгө алынганынан улам токтотулган. Кантип абакты башкарып калганын түшүнбөй жатам", — деди ал.
Анын айтымында, түзөтүү колония системасы реформалоого муктаж, анткени учурда ал жерде абийирдүү кызматкерлерге да иштөө бир топ татаал.
"ЖАМКта өз ишине берилген, темир тартип орнотууга даяр атуулдар бар. Бирок көп жыл иштеген кызматкерлердин арасында ондой киши абалды өзгөртүүгө караманча каршы болуп келет", — деди Байзаков.
ЖАМКтын маалымат катчысы Александр Никсдорф Килтаевдин 2012-жылдын март айында кызматтан четтетилгенин тастыктады.
"Андан кийин ал сотко кайрылып, кайра кызматка келген. Чынында, абал кандай экенин билбейм, бирок ал киши кызматта реформага каршы адамдар бар экенин айтып атса, демек ошондой. Ал чыныгы кесипкөй адам катары анык кырдаалды жакшы билет да. Бирок анын бул системада иштебей калганына төрт жыл болду", — деди Никсдорф.
