БИШКЕК, 12-окт. — Sputnik. Кыргызстандыктар кыргыз-казак чек арасынан эгер коштоочу жана уруксат берүүчү документтери болсо каалашынча ун алып өтүүгө боло турганын Мамлекеттик чек ара кызматынын маалымат кызматы билдирди.
Өлкөгө алынып келип жаткан күйүүчү жана майлоочу майларды көзөмөлгө алуу максатында коштоочу жана уруксат берүүчү документтери жок алынып келип жаткан товарлардын көлөмүнө чектөө киргизилди.
"Жеке колдонуу үчүн беш кап ун, машинанны багына толтура жана ага кошумча 20 литрлик канистра менен күйүүчү май алып өтүүгө уруксат берилет", — деп айтылат билдирүүдө.
Өлчөмсүз көлөмдө ун алып өтүү үчүн коштоп жүрүүчү документтери толук болушу керек, Кыргызстандан Казакстанга күйүүчү май алып өтүүгө тыюу салынды.
Мамлекеттик чек ара кызматынан билдиришкендей, кыргыз-казак чек арасынан өткөндөр мамлекеттик текшерүүдөн өткөнү жөнүндө талон толтурууга милдеттүү.
