БИШКЕК, 12-окт. – Sputnik. Өкмөт башчысы Темир Сариев Сокулук районундагы "Агропродукт Азия" логистикалык борборунун ачылышына катышып, борбор айыл чарба жана экономикабызга өз пайдасын тийгизет деген ишенимин билдирди.
Борбор 2 700 чарчы метр аянтка жайгашып, үч миң тоннага чейинки жашылча-жемиш сактоо мүмкүнчүлүгүнө ээ.
"Заманбап шарттарга жооп берген, Европалык стандарттын жана голландиялык үлгүнүн негизинде курулган борбордун демилгечилери жаш, жигердүү жана демилгелүү жигиттер экени бизди абдан кубандырат. Бул логистикалык борбордун Чүй аймагы үчүн эле эмес, жалпы өлкө масштабында маанилүү окуялардын бири болууда",— деди Сариев.
Өкмөт башчысы бул борбордун ишке берилиши Кыргызстан ЕАЭБге кошулуу менен айыл чарба жана кайра иштетүү тармагын жанданттуу жаатында активдүү иш-аракеттердин башталган тапка дал келгени өзгөчө мааниге ээ экенин кошумчалады.
Бул маселени чечүү үчүн өкмөт ушул сыяктуу логистикалык борборлорду, жашылча-жемиш сактоочу жайларды жана күнөсканаларды куруу боюнча иштери аткарууда.
Өкмөттүн токтомуна ылайык, Кыргызстандын аймагында 2017-жылга чейин эки эл аралык соода-логистикалык борборду жана аймактык жети логистикалык борборду куруу каралган.
Премьер-министрдин айтымында, соода-логистикалык борборлорду куруу айыл чарба өндүрүүчүлөрүнүн жашылча-жемиш продукцияларын сактоого, бөлүштүрүүгө жана ташууга кеткен каражатын 50 пайызга азайтат.
"Дыйкандарга тиешелүү шарттарды түзүп, жеңилдетилген насыялар менен камсыз кылуу максатында быйыл өлкөдөгү 8500гө жакын дыйкан-фермерге үч миллиард сомдон ашык жеңилдетилген насыя берилди" – деди Сариев.
Анын айтымында, ар бир акимге жылдын аягына чейин өз районунда 10дон кем эмес ишкана ачуу тапшырылган.
