БИШКЕК, 9-окт. — Sputnik. Баткен шаардык хатибияты "Эл аралык толеранттуулук үчүн" фонду Баткен облустук казыяты менен биргеликте аялдардын үй-бүлөдөгү ролу туурасында жолугушуу өткөргөнүн Баткен облустук мусулмандар казыятынын басма сөз кызматы билдирди.
"Үй-бүлөнү бекемдөөдө аялдардын ролу" деп аталган бул жыйынга Баткен шаарынын Чек, Кызыл-Бел, Кара-Бак жана Самаркандек айылдарынан 25 кыз-келин катышты.
"Иш-чаранын максаты — үй-бүлөлүк чыр-чатактардын алдын алып жана аларды тынчтык жолу менен чечүүгө багыт берүү жана аялдардын үй-бүлөлүк ынтымакты бекемдөөдөгү ролун түшүндүрүү",— деп билдиришти аталган казыяттын маалымат кызматы.
Иш-чаранын жүрүшүндө, андан сырткары, аялдардын коомдогу жана үй-бүлөдөгү орду, милдеттери, укуктары, артыкчылыктары жөнүндө сөз болду. Үй-бүлөдө чыр-чатактар эмне себептен келип чыгат жана ал чыр-чатактардын алдын алууда, чечүүдө аялдардын орду канчалык деген темада кеңири талкуу жүрдү.
