БИШКЕК, 8-окт. — Sputnik. Краснодарда жаңы төрөлгөн ымыркайын үйдүн чатырына таштап кеткен кыргызстандык аялга карата козголгон кылмыш иши аягына чыкканын Sputnik агенттигине аталган округдун прокурорунун башкы жардамчысы Анна Полякова билдирди.
Краснодардын тургуну 24-август күнү таңкы саат беште Чалгынчы баатырлар көчөсүндө жайгашкан көп кабаттуу үйдүн чатырынан жаңы төрөлгөн наристе таап алып, дароо полиция менен тез жардам кызматкерлерине кайрылган.
"Ымыркай учурда реанимацияда. Дарыгерлер бала перинаталдык сепсис менен жабыркаганын, мындан тышкары, өпкөсү сезгенип, талманын белгилери бар экенин аныкташты", — деди Полякова.
Полиция кызматкерлери ымыркайдын энеси туугандары менен батирде жашаган 26 жаштагы кыргызстандык аял экенин аныкташкан.
"Иш сотко өттү. Ымыркайдын энесине карата "Баланын өмүрүнө коркунуч жаратуу" беренеси боюнча кылмыш иши козголду", — деди маектеш.
Аталган берене боюнча кыргызстандык аял айып пул төлөп же бир жылга эркинен ажырашы каралган.
