БИШКЕК, 7-окт. — Sputnik. Малайзиянын ТV3 телеканалы Кыргызстандын улуттук тамак-ашы боюнча документалдык тасма тарта турганын аталган өлкөдөгү элчилик билдирди.
Тасма каналдын Primeworks студиясы тарабынан тартылат. Бул үчүн Кыргызстанга тандалып алынган үч малайзиялык ашпозчу келип, республиканы түрө кыдырып, жергиликтүү ашкана менен маданияттын артыкчылыктарын айтып берет.
"Кыргызстан тууралуу алты эпизод тартылып, жалпы жонунан сапар 21 күнгө созулат. Топко жергиликтүү ашпозчуларды да кошуу божомолдонуп жатат", — деп айтылат билдирүүдө.
Кыргызстандын Малайзиядагы элчилиги бул мамлекеттин туристтик мүмкүнчүлүгүн даңазалоо үчүн мыкты шарт деп эсептейт.
Тартылган тасма Малайзиянын ТV3 телевидениесинен 2015-жылдын декабрь айында көрүүчүлөргө тартууланат.
