БИШКЕК, 5-окт. — Sputnik. Сомдун түшүшү шайлоонун аякташына байланыштуу экенин Карасаев атындагы БГУ менеджмент жана социалдык-маалымат технологиялар кафедрасынын башчысы, экономика илимдеринин кандидаты Кеңешбек Алимбеков билдирди.
Айрым акча алмаштыруу жайлары долларды 70 сомдон сатууга даяр. Сентябрдын ортосунда 72 сомго жетип, жогорку көрсөткүчтү багындырган. Бирок Улуттук банктын валюталык интервенциялары шайлоо кампаниясы менен катар сомдун кунун туруктуу кармап турууга өбөлгө болгон.
"Шайлоо алдында сомго болгон суроо-талап күчөйт. Партиялар үгүт өнөктүгүндө улуттук валюта менен эсептешет. Мындан улам ал туруктуу болот. Шайлоо аяктагандан кийин сомдун баасы төмөндөйт", — дейт экономист.
Анын айтымында, сомдун кийинки тагдыры нефтиге болгон баадан жана ЕАЭБ мамлекеттериндеги кырдаалдан көз каранды болот.
