БИШКЕК, 5-окт. — Sputnik. Жаңы парламентте оппозицияда "Ата Мекен" менен "Республика — Ата-Журт" калышы мүмкүндүгүн "Коомдук иликтөө институту" уюмунун жетекчиси Рита Карасартова Sputnik агенттигине билдирди.
Карасартова бул шайлоодо депутат болуп келе турган ишкерлер көп болгондуктан, алар күчтүү оппозицияны түзө албайт деген пикирде.
"Депутат болуп бизнесмендер келип жатат. Алар күчтүү оппозицияны түзө албайт. Себеби, ар биринин бизнеси бар болгондуктан, бийлик бат эле чөгөлөтүп коёт. Аларды багындыра турган ыкмалар мамлекеттин колунда. Мисалы, Финансылык полиция, салык кызматы сыяктуу күчтөр", — дейт ал.
"Коомдук иликтөө институту" уюмунун жетекчиси бул жолу оппозицияда эки партия калышы мүмкүндүгүн кошумчалады.
"Оппозицияда кимдин калышы мен үчүн табышмак. Бирок "Республика — Ата-Журт" менен "Ата Мекен" оппозицияда болуп, калгандары биригеби деген божомол бар", — дейт Карасартова.
Шестаков "Бир Бол" жана "Республика — Ата-Журт" партияларынын программасы жалаң реформаларга толгондуктан, оппозицияда туруп аларды ишке ашыра албастыгын белгиледи.
Өкмөт башчы катары Темир Сариевдин калышы өтө күмөндүү дейт саясат таануучу.
"Күчтүү партиялар келишти. Алардын катарында премьер боло тургандар бар", — деди саясат тануучу.
4-октябрда Кыргызстанда парламенттик шайлоо болуп, ага 14 саясий партия катышкан. КМШ мамлекеттеринин ичинен Кыргызстанда биринчилерден болуп шайлоону биометрикалык маалыматтарды колдонуу менен өткөрдү. Өлкөнүн 2 миллион 671 миң 297 жараны биометрикалык маалыматтарын тапшырган.
