Сариев парламенттик шайлоону жыйынтыктап жатып, добуш берүүгө катышуу жогору болгонун белгиледи.
"Кыргызстандын тарыхында биринчи жолу биометрикалык технологиялардын жана автоматтык эсептөөчү урналардын жардамы менен шайлоо өткөрдүк. Биометриканын негизиндеги ачык, таза шайлоо бийликтин күчүн айгинеледи", — деди өкмөт башчы.
Премьер-министр таза шайлоо өткөрүү президенттин, өкмөттүн жана жалпы мамлекеттик бийликтин саясий эркинен кабар берип, анын эрдигин көрсөтөрүн кошумчалады. Анын айтымында, биометрикалык идентификациянын "1 шайлоочу — 1 добуш" принциби толук сакталды.
"Административдик ресурсту колдонбой шайлоо өткөрө алдык, коопсуздукту, тартипти камсыздадык. Бардык партияларга бирдей шартта үгүт өнөктүгүн жүргүзүүгө шарт түздүк. Эң ири жетишкендигибиз, "айлампа" аталган дарттан арыла алдык", — деди өкмөт башчы.
Сариев 69 мамлекеттен келген эл аралык байкоочулар шайлоонун уюштурулушуна жогорку баа бергенин белгиледи.
"Шайлоочулар биз күткөндөн азыраак келди. Бирок буга чейинки шайлоолордон айырмаланып, буга тирүү адамдар добуш берди", — деди премьер-министр.
Өкмөт башчы өлкөдөгү коомдук-саясий абал укук коргоо органдарынын толук көзөмөлүндө экенин маалымдады.
