БИШКЕК, 4-окт. — Sputnik. Кандайдыр бир себептер менен добуш бере албай жаткан жарандар шайлоо участкалары жабылганга чейин добуш бере алышат. Бул тууралуу биринчи вице-премьер-министр Тайырбек Сарпашев маалымат жыйында билдирди.
Анын айтымында, Бишкек жана Ош шаарында кошумча ачылган шайлоо участкаларында элдин көп кезекке турганы байкалууда.
"Шайлоочулардын негизги агымы саат 16.00дөн кийин келет", — деди Сарпашев.
Ал жалпысынан одоно мыйзам бузуулар катталбаганын кошумчалады.
"Техникалардын бузулуп жатканы шайлоочулардын добуш берүүсүнө жолтоо боло албайт", — деди ал.
Бүгүн өлкө боюнча парламенттик шайлоо өтүүдө. Ага 14 саясий партия ат салышууда. Саат 14.00гө алынган маалымат боюнча, шайлоочулардын 20 пайызы өз добуштарын беришти.
