БИШКЕК, 2-окт. — Sputnik. Бүгүнкү күндө Кыргызстанда 27 миң 450 мүмкүнчүлүгү чектелген бала бар экенин, анын 4500cү шал оорусуна кабылганын Ысык-Көлдө өткөрүлгөн медициналык тренингдин жыйынтыгы оюнча өткөн маалымат жыйында белгилүү болду.
Төрт жумага созулган окуу учурунда негизинен шал оорусуна кабылган балдарга кам көрүүдөгү заманбап технологиялар көрсөтүлдү. Мындай дарт менен жабыркагандарга дары-дармек көп жардам бербей турганы эске алынып, чет элдик адистер жергиликтүү дарыгерлер укалоо ыкмаларын, атайы көнүгүүлөрдү жасоону үйрөттү.
"Окуунун натыйжасында 28 ар тармактагы адистин тийиштүү билим алышы болду. Булар дарылоо жана жардам берүү системасын өзгөртүүчү негизги күч болот", — деди дарылоо-профилактикалык жардам бөлүмүнүн башкы адиси Боронбаева.
Саламаттык сактоо министрлигинин өкүлү шал оорусу менен жабыркаган балдардын санын кыскартуу үчүн алгач энелердин илдетке кабылуусун алдын алуу иштерин жүргүзүү керек экенин белгиледи.
"Ооруга жатын ичиндеги жугуштуу оорулар себеп болот. Андыктан болочок эне өз учурунда текшерүүдөн өтүп, жакшы тамактанып, эң башкысы, жоопкерчиликти сезиши керек", — деди дарыгер.
Иш-чара Саламаттык сактоо министрлиги, ЮНИСЕФ жана Австралиянын мамлекеттик реабилитациялык борборунун адистери тарабынан уюштурулган.
