БИШКЕК, 2-окт. — Sputnik. Улуттук коопсуздук боюнча комитеттин маалымат кызматы Чүй облусунда теракт жүргүзүүгө камданган согушкер кантип кармалган жөнүндө маалымат таратты.
Жума күнү Sputnik маалымат агенттигине "Ала-Тоо" айылында атылган октун үнү туурасында маалым болгон. Андан бир аз убакыттан кийин УКМК жардыруу уюштурууну көздөгөн деген шек менен бир адам кармалганын билдирген.
УКМКдан ал адам эл аралык террордук топтун мүчөсү экенин жана колго жасалган бир катар жардыргыч заттардын жардамы менен Кыргызстандын аймагында терактыларды уюштурууну пландаган. Ал турган жайдан колго жасалган тапанча, ок-дары, кол гранатасын, колго жасалган жардыргычтын бөлүктөрүн, бычак, кастет, экстремисттик маанайдагы электрондук түрдөгү адабияттарды табышкан.
"Кармалган киши террористтик жашыруун уюмга тиешеси бар экенин жана террордук актыларды уюштурууну көздөгөнүн мойнуна алды",— деп билдирди маалымат кызматы.
Ведомстводон УКМКнын кызматкерлери аны кармоо учурунда ок атуучу курал колдонулбаганын билдиришти.
Кыргызстандын атайын кызматтары террорчулук жана жашыруун иш алып барган террордук уюмдарды таап, алардын иш-аракеттерине бөгөт коюучу иш-чараларды улантып жатат.
Буга чейин бир нече күн мурда УКМК шайлоо күнү диний-экстремисттик жана криминалдык топтордун шайлоо процессин үзгүлтүккө учуратууга багытталган акцияларын өз учурунда аныктоо жана алдын алуу боюнча иш-чараларга басым жасай турганы жөнүндө маалымат кызматы билдирүү тараткан.
