БИШКЕК, 2-окт. — Sputnik. Шаардын жолдорун оңдоо менен катар анын эстетикасына көңүл буруу керектигин премьер-министр Темир Сариев унаа жолдорундагы оңдоо иштеринин жүрүшү менен таанышуу учурунда билдирди.
Премьер-министр жолдордогу курулуш иштери менен таанышууну борбор калаадагы Мухтар Ауэзов көчөсүнөн баштап, аталган көчөдөн Жибек Жолу көчөсүнө чейинки аралыкты оңдолбой жатканын сынга алды.
Сариев ошондой эле көчөнүн четиндеги мыйзамсыз соода күркөлөрүн алдырып жаткан мэриянын ишин кубаттады.
"Шаардын жолдорун, ирригациялык системаларын оңдоо менен катар анын эстетикасына көңүл буруу керек. Мыйзамдуу жол менен чара көрүп, шаарды иретке келтирүү зарыл. Мындай чара айрым адамдарга катуу тийиши мүмкүн. Бирок биз аз сандагы топтун жеке кызыкчылыгы үчүн жалпы шаардыктарга ыңгайсыздык жаратпашыбыз керек", — деди өкмөт башчы.
Премьер-министрдин айтымында, бул жолдор бүткөрүлгөн соң шаарды айланма жол ачылып, ал борбордун ичиндеги автотыгындарды азайтууга өбөлгө болот.
Бишкек мэриясынын маалыматы боюнча, Патрис Лумумба көчөсү 15-ноябрга чейин, ал эми Садыгалиев көчөсү 25-октябрга чейин бүткөрүлмөкчү.
Сариев шаардын инфракструктурасын жакшыртуу боюнча долбоорлор уланарын маалымдап, кийинки жылы бул үчүн 3,5 миллиард сомго жакын каражат каралып жатканын кошумчалады.
"Бул каражатка 49 көчөнүн жолу оңдолуп, ирригациялык системалар алмаштырылат. Муну менен катар шаардагы транспорттук маселелерди чечүү үчүн эл ташуучу автобустар сатылып алынмакчы. Бул үчүн жакынкы аралыкта тендер өтөт", — деди премьер-министр.
Өкмөт башчы эки жыл аралыгында Бишкекте көп өзгөрүүлөр болуп, шаар жаңы көрүнүшкө ээ болорун белгиледи.
