БИШКЕК, 2-окт. — Sputnik. Президент Алмазбек Атамбаев Ички иштер министрлигинин 180 кызматкерине жаңы батирлердин ачкычын тапшырды. Бул тууралуу аталган министрлик билдирди.
Президент өз сөзүндө укук коргоо кызматкерлери үчүн үй куруу иштери келерки жылы да улантыларын белгиледи.
"Жакында Беловодское айылында бир үйдү пайдаланууга беребиз. Андан кийин Ош шаарында дагы 60 милиция кызматкерине жаңы турак-жайдын ачкычын тапшырабыз", — деди өлкө башчы.
Куттуктоо сөзүндө Атамбаев эми милицияга камкордук менен бирге талап да күчөтүлө турганын айтты.
"Кыска аралыктын ичинде укук коргоо органдарынын кызматкерлери өз кадыр-баркын кайра калыбына келтириши керек. Бир эле кызматкердин туура эмес аракети бүтүндөй милицияга көө жабат. Терс жоруктарга баргандар министрлик тарабынан катуу жазага алынышы керек", — деди президент.
Милиция кызматкерлерине ден соолук, кажыбас кайрат каалап, өлкө башчы ички иштер министри Мелис Турганбаевге балдар аянтчасын куруу үчүн 300 миң сом берди.
Маалыматка ылайык, Көк-Жар жаңы конушуна курулган 180 батирлүү тогуз кабаттуу эки турак жайдын курулушу 2014-жылы башталып, ага жалпы жонунан 258 миллион сом жумшалган.
