БИШКЕК, 1-окт. — Sputnik. Кыргызстанда газдын баасы кымбаттаганын "Газпром Кыргызстан" ишканасы билдирди.
Маалыматка ылайык, октябрдан тарта калк үчүн көгүлтүр оттун бир метр кубу 15,60 сомдун, өнөр жай ишканалары, коммерциялык жана бюджеттик уюмдар үчүн 19 сомдун деңгээлинде бекиди.
Мындан улам, газдын наркы өткөн айга салыштырмалуу калк үчүн 70, ал эми ишканалар үчүн 80 тыйынга кымбаттады.
"Газпром Кыргызстан" газдын баасынын жогорулашы доллардын расмий курсунун өсүшүнө байланыштуу экенин белгилейт.
Мыйзамга ылайык, ишкана ар бир айдын башында Улуттук банк тарабынан бекитилген АКШ долларынын курсуна карата тарифти кайрадан эсептеп чыгышы керек. Эгер сентябрдын башына доллардын курсу 65,09 сомго барабар болсо, октябрь айында 68,82 сомдун чегине жеткен.
