БИШКЕК, 30-сен. — Sputnik. Россиядагы кыргызстандыктар түзүлгөн келишимдерге карабастан, бир топ кыйынчылыктарга туш болуп жатышканын эмгек, миграция жана жаштар министри Айбек Азыранкулов Новосибирск облусуна болгон иш сапарынын жыйынтыгы менен билдирди.
Азыранкуловдун айтымында, келишим толук кандуу аткарылбай жатканы аныкталган. Кыргызстандыктар дагы деле айрым кыйынчылыктарга туш болушууда.
"Федералдык миграция кызматы боюнча эч кандай көйгөй жок. Тоскоолдуктар башка мекемелер менен иштешүүдө башталды. Россиянын Чек ара кызматы, ИИМ жана башка структуралары протокол түзүшүп, биздин жарандарды келишимге карабай артка кайтарып жиберишкен", — деди министр.
Министрлик, элчилик өкүлдөрү жана депутаттар маселелерди чечүү үчүн облус губернаторлору менен жолугууну чечишкен.
"Биздин бир аймактын губернаторунун орун басарын аталган көйгөйлөрдү чечүүгө жоопкер кылуу сунушубуз колдоо тапты", — деди Азыранкулов.
Красноярск крайынын өкмөтүнүн вице-төрагасы Виктор Зубарев саясий чечимдердин тезинен кабыл алынышы тийиштүү маалыматтын жеткиликтүүлүгүн кыйындатып жатканын белгиледи.
"Бардык макулдашуу ФМКга жеткени менен ИИМге жетпей калышы мүмкүн. Бул жерде техникалык жагдайлар себеп болуп жатат", — деди ал.
Буга чейин тыюу салынган 49 миң жарандын 16 миңине Россияга кирүүгө уруксат берилген.
