БИШКЕК, 29-сен. — Sputnik. Президент Алмазбек Атамбаев Улгайгандардын эл аралык күнү белгиленер алдында карылар жана майыптар үчүн социалдык алты мекеменин жетекчилерине акча сертификаттарын тапшырды.
Атамбаев карылар менен майыптардын стационардык мекемелериндеги көйгөлүү маселелерди чечүү үчүн зарыл жардамдарды көрсөтүү тапшырмасын берди.
Мамлекет башчысы карыларыбыз жаратмандардын мууну, алар Кыргызстанга эмгектеги жана согуштагы каармандыктын үлгүсүн көрсөткөн, акылкөй, чыныгы мекенчил, туулган жерин ардактаган адамдар экендигин белгиледи.
"Алар өлкөнүн келечеги үчүн иштеген. Бүгүн республикабыз сыймыктанган, бардык жакшы нерселер алардын колунан жаралган. Биз аларга карыздарбыз, ар бир карыябыз камкордукту сезгидей иштерди жасаганга милдеттүүбүз", — деди Атамбаев.
Президент стационардык мекемелерде жашаган карыларга аяр мамиле жасап, камкордук кылуу өзгөчө мааниге ээ экендигин айтты.
Жалпы суммасы 4 млн. 900 миң сомго керектүү техникалык каражат жана турмуш-тиричилик техникасын сатып алуу үчүн сертификаттар төмөндөгү мекемелерге тапшырылды:
— Бишкектеги карылар жана майыптар үчүн шаардык социалдык стационардык мекеме;
— Бакай-Атадагы карыларды жана майыптарды реабилитациялоо мүнөзүндөгү социалдык стационардуу мекеме;
— Сүлүктүдөгү карылар жана майыптар үчүн социалдык стационардык мекеме;
— Сузактагы карылар жана майыптар үчүн социалдык стационардык мекеме;
— Токтогулдагы карылар жана майыптар үчүн социалдык стационардык мекеме.
Андан тышкары, аталган социалдык стационардык мекемелерге Улгайгандардын эл аралык күнүнө байланыштуу майрамдык сый тамакты уюштуруу үчүн президенттик социалдык коргоо жана колдоо фондунан жалпы суммасы 550 миң сомдук каржылык колдоо көрсөтүлдү.
