БИШКЕК, 28-сен. — Sputnik. Премьер-министр Темир Сариевдин тапшырмасы менен Аманжан Шүкүровдун үй-бүлөсү үчүн турак жайдын курулушу башталганын өкмөттүн маалымат кызматы билдирди.
Курман айт күнү премьер-министр аталган үй-бүлөгө барып, жашоо шарты менен танышкан. Жолугушуу учурунда майыптыкка байланыштуу үй-бүлөнүн бир да мүчөсү иштебей турганы, мамлекеттик жөлөк пулдан башка кирешеси жок экени маалым болгон.
Өкмөт башчы менен сүйлөшүп отуруп, үй-бүлөнүн ээси Аманжан Шүкүров үйдүн бетон полун алмаштырып, көптөн бери турак жайын оңдоону кыялданып жүргөнүн айткан. Өз кезегинде Сариев аталган үй-бүлөгө там куруп берүүгө көмөк көрсөтөрүн билдирген.
Учурда өкмөт башчынын тапшырмасы менен Шүкүровдордун үй-бүлөсү үчүн жаңы үйдүн курулушу башталды. Ага Сариевдин жеке эсебинен каражат бөлүндү. Курулуш иштерин ноябрь айына чейин аяктоо пландаштырылууда.
