БИШКЕК, 28-сен. — Sputnik. Кыргыз-өзбек чек арасындагы "Достук" өткөрүү пунктуна жакын жайгашкан тургундар тез аранын ичинде башка жакка көчүрүү керектигин вице-премьер Абдырахман Маматалиев аталган жайды текшерүү учурунда билдирди.
Маматалиев Кара-Суу районунун "Достук" пунктуна жакын жайгашкан "Жаңы-Турмуш" айылындагы "Катта-Терек" тилкесинин жашоочулары менен жолугуп, аталган пункттун инфраструктурасын жакшыртуу боюнча түшүндүрүп берди.
Ага ылайык, вице-премьер жергиликтүү тургундарды башка жактан жер тилкелерин берүү, бардык тийиштүү шарттарды түзүүнү мамлекеттик органдарга тапшырды.
"Өткөрүү пункттарындагы тейлөөнү барган сайын жакшыртуу, чек арадан өткөн адамдар үчүн бардык ыңгайлуулуктарды түзүп берүү — негизги милдет. Бул "Достук" пунктун бүгүнкү күндүн талабына ылайыктоо болуп саналат. Өз кезегинде ал инфраструктураны кеңейтүүгө, логистиканы жакшыртууга өбөлгө түзөт", — деди вице-премьер.
"Достук" өткөрүү пунктунун шарттарын жакшыртуу максатында өкмөттүн буйругу менен мекемелер аралык комиссия түзүлүп, аны вице-премьер Маматалиев жетектейт.
