БИШКЕК, 26-сен. — Sputnik. Окуучулардын өлүмүнө алып келген кырсыктарды атайы түзүлгөн комиссиялар иликтей турганын вице-премьер Дамира Ниязалиева Жумгал районуна болгон иш сапарынын учурунда билдирди.
Маалыматка ылайык, вице-премьер аталган аймактын Көк-Ой айылында болуп, Турусбек уулу Султан атындагы мектептин жетекчилиги, жергиликтүү жашоочулар менен жолукту.
Ниязалиева окуучунун өлүмү менен аяктаган кырсыкты жеке көзөмөлүнө аларын, бүтүндөй өлкө боюнча катталган ушул сыяктуу окуяларды иликтөө үчүн атайы комиссия түзүлгөнүн белгиледи.
"Бул кырсыктарда мугалимдердин да, ата-энелердин да күнөөсү бар. Мунун баары окуучулардын арасында орун алган мыйзам бузуулардын терең экенинен кабар берет. Кырдаалды жөнгө салуу боюнча тез аранын ичинде чара көрөбүз", — деди вице-премьер.
Төрт күндөн кийин ИИМ Эркинбекти уруп жиберген 11-класстын окуучусу Жайылбек Таалайбеков эки айга камакка алынганы тууралуу маалымат тараткан.
