БИШКЕК, 24-сен. — Sputnik. Сауд Аравиянын Мина өрөөнүндө тепсендиде калып каза болгондордун арасында кыргызстандык зыяратчылар жок экенин Кыргызстан мусулмандар дин башкармалыгынын маалымат кызматы Sputnik агенттигине билдирди.
Кырсык ажылыктын негизги ибадаттарынын бири иретинде шайтанга таш ыргытуу учурунда болгон.
12-сентябрда Аль-Харам мечитинде курулушта иштеп жаткан кран кулап 100дөй киши каза болгон.
Сауд Аравиясында зыярат учурунда тепсендиде калган учурлар буга чейин да катталган. 1990-жылы тепсендиде калып 1400 киши каза болгон.
Быйыл Сауд Аравиясы Кыргызстанга ажылык сапарга 3685 квота бөлгөн. Кийин кошумча дагы 500 орун бөлүнгөн. Ажыдан мусулмандар 28-сентябрдан тартып 15-октябрга чейин кайтып келишет. Ал эми ажылык сапардын баасы 2550 долларды түзгөн.
