БАТКЕН, 17-сен. – Sputnik. Баткендеги милиция кызматкерлери үчүн салынган үйдүн ачкычтарын тапшырып жатып, президент Алмазбек Атамбаев кыйчалыш учурда милицияны элдин алдына салып берген бийлик тарых барактарында жазылып калды дейт.
Анын айтымында, учурдагы бийлик күч түзүмүндө иштегендерге көңүл буруп, алардын социалдык көйгөйлөрүн чечүүгө жигердүү аракеттерди көрүүдө.
"Милицияны жетиштүү айлык, үй менен камсыздабай, калктын кыжырына тийип, элдин алдына салып берген бийлик да тарыхта калды. Андай бийлик Кыргызстанда болбошу керек", — деди Атамбаев.
Президент милицияга азыр жакшы көңүл бурулуп, Ош, Бишкек шаарларында күч түзүмдөрү үчүн батирлер салынып жатканын кошумчалады. Мындай аракетти эки жылдан кийин шайлана турган президент да улантарына ишеним артты.
"Акыркы жылдары милицияга болгон мамиле өзгөрдү. Эмки президент жана жаңы шайлана турган өкмөт бул жөрөлгөнү улантат. Стандарттар аныкталды, башталышы бар. Буюрса, мындан ары күч түзүмүндө иштегендерге болгон мамиле таптакыр өзгөрөт", — деди мамлекет башчы.
Атамбаев убагында башталган иштер учурда үзүрүн берип жатканын, милиция үчүн болгон оор мезгилдер атта калганын белгилеп, жаңы курулган үйдүн алдындагы балдар аянтчасын курууга 300 миң сом тапшырды.
