БИШКЕК, 16-сен. – Sputnik. "ИИМдеги Бауржан" тууралуу видеонун каарманы, Mercedes үлгүсүндөгү унаанын ээси айдоочулук күбөлүгүнөн бир жылга чейин ажыратылышы мүмкүн экенин Бишкек ШИИБ билдирди.
Маалыматта 13-сентябрь күнү таңкы саат алтыда Чүй проспекти менен Сүйөркулов көчөсүнүн кесилишинде Mercedes Benz каршысындагы тилкеге чыгып, милиция унаасынын жолун торой токтогон.
Андан кийин Ренат аттуу айдоочу унаадан чыгып, соода түйүндөрүнүн бирине жөнөгөн. Инспекторлор андан машинанын документтерин сураган учурда орой сөздөр менен милиция кызматкерлерин коркута баштаган.
Айдоочуну республикалык наркология борборуна алып баргандан кийин анын мас экени аныкталган.
Бул боюнча 238-берененин негизинде административдик протокол түзүлдү. Ага ылайык, мас абалында унаа айдаганы үчүн айдоочуга 10 миң сомдук айыптан бир жылга чейин айдоочулук күбөлүктөн ажыратуу жазасы каралган.
Кармалган айдоочу кое берилген, бирок машина унаа токтотуучу жайга киргизилген. Аталган факт боюнча материалдар Свердлов райондук сотко жөнөтүлдү.
